Caravan of Courage: An Ewok Adventure

Caravan of Courage: An Ewok Adventure, oarspronklik koartwei The Ewok Adventure neamd, is in Amerikaanske tillefyzjefilm út 1984 ûnder rezjy fan John Korty. It is in science fiction-fantasy-aventoerefilm foar bern mei yn 'e haadrollen Eric Walker, Warwick Davis en Aubree Miller. De titel betsjut "Karafaan fan Moed: In Ewok-aventoer". De film wie de earste fan 'e beide Ewoks-films dy't mids 1980-er jierren makke waarden as spin-offs fan Star Wars: Episode VI – Return of the Jedi (1983), it ôfslutende diel fan 'e oarspronklike Star Wars-filmtrilogy. Caravan of Courage heart sadwaande ta de Star Wars-franchise. Yn 'e ynterne gronology fan 'e mediafranchise wurde de foarfallen yn 'e film pleatst foarôfgenade oan dy yn Return of the Jedi.

Caravan of Courage An Ewok Adventure
film
(Filmposter yn 'e Ingelske Wikipedy)
makkers
regisseur	John Korty
produsint	Thomas G. Smith Patricia Rose Duignan
útfierend    produsint	George Lucas
senario	Bob Carrau
kamerarezjy	John Korty
muzyk	Peter Bernstein
filmstudio	Lucasfilm Korty Films 20th Century Fox Television
distribúsje	20th Television
spilers
haadrollen	Eric Walker Warwick Davis Aubree Miller
voice-over	Burl Ives
byrollen	Daniel Frishman Debbie Lee Carrington Tony Cox Kevin Thompson Margarita Fernández
skaaimerken
lân/lannen	Feriene Steaten
premiêre	25 novimber 1984
foarm	tillefyzjefilm
sjenre	science fiction-fantasy-    aventoerefilm foar bern
taal	Ingelsk en Ewokeesk
spyltiid	98 minuten
budget en resultaten
prizen	1× Emmy Award
filmsearje
filmsearje	Ewoks-films
● folgjend diel	Ewoks: The Battle for Endor

It ferhaal giet oer de minsklike húshâlding Towani, dy't skipbrek lijt op 'e Boskmoanne Endor. Wylst se harren romteskip besykje te reparearjen, rekket it gesin útinoar as in reuseftich wêzen dat de Gorax neamd wurdt, de âldelju ûntfiert. In groepke Ewoks, de lânseigen bewenners fan Endor, ûntfermet him oer de lykme-allinne efterbleaune minskebern. As se foar it ferstân krije wat de âldelju fan Mace en Cindel oerkommen is, sette se ôf op in kweeste om harren te rêden. Caravan of Courage waard foar it earst op 'e Amerikaanske tillefyzje útstjoerd mei Thanksgiving 1984. Om utens waard de film yn 'e bioskoop útbrocht. Caravan of Courage wie ien fan fjouwer films dy't yn 1985 de Emmy Award foar bêste special effects takend krigen, mar hjoeddeistige resinsjes binne oer it algemien negatyf. In jier letter waard in ferfolchfilm op 'e tillefyzje brocht, Ewoks: The Battle for Endor.

Plot

Op Endor, in moanne fan 'e gasreus Tana, is it romteskip fan 'e minsklike húshâlding Towani delstoarten. Wylst de âldelju Catarine en Jeremitt besykje it skip te reparearjen, dwale de fjirtjinjierrige soan Mace en de fiifjierrige dochter Cindel op in nacht ôf. Wannear't Catarine en Jeremitt derop útgeane om 'e bern te sykjen, komt in Gorax harren oer it mad. Dat is in semy-yntelligint, reuseftich wêzen dat lânseigen is op Endor. It nimt Catarine en Jeremitt finzen en ûntfiert harren.

Nei de foar harren mysterieuze ferdwining fan har âlden bliuwe de beide bern lykme-allinne efter. Se wurde fûn troch Deej en syn soannen Weechee en Widdle, dy't Ewoks binne: leden fan in yntelligint ras fan bûtenierdske wêzens op Endor, mei in jager-sammelder-kultuer dy't de Stientiid net fier ûntstige is. De Ewoks nimme Mace en Cindel mei werom nei harren wente, Cindel frijwillich en de eigenwize Mace minder frijwillich. De lytse Cindel is earst siik, mar nei't se ûnder fersoarging troch de Ewoks opbetteret, slút se al rillegau freonskip mei Wicket, de jongste fan 'e trije soannen fan Deej en Shodu. Mace sjocht de Ewoks earst as net folle mear as bisten en is wisberet om Cindel mei werom te nimmen nei it wrak fan it romteskip om dêr de weromkear fan harren âlden ôf te wachtsjen.

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Op in nacht, as alle Ewoks djip yn 'e sliep binne, makket Mace Cindel wekker. Hy negearret har tsjinakseljen en set mei har it wâld yn om werom nei it romteskip. De beide bern lûke de oandacht fan in reuseftige everwolf en wurde troch dat ferskuorrende rôfdier efterfolge oant se beskûl fine yn in holle beam. Dêr kin de everwolf net by harren, dat dêr bringe se de rest fan 'e nacht troch. Se wurde de oare moarns wekker troch it leven fan in gefjocht by de holle beam. It docht bliken dat Deej, Weechee, Widdle en Wicket harren spoar folge binne doe't se wekker waarden en murken dat de bern poater wiene. No nimme de lytse Ewoks it ûnferskrokken op tsjin 'e oergrutte everwolf. As Wicket it meunster úteinlik mei in gifpylkje út in blaaspiip wit te deadzjen, ûntdekt Mace dat de everwolf in halsbân draacht, en dat dêroan de libbensmonitor (in technologyske polsbân) fan syn heit Jeremitt fêstmakke is.

Deej-en-dy nimme Mace en Cindel mei nei it doarp fan 'e Ewoks, dat heech yn 'e beammen fan it wâld boud is, om op besite te gean by de Ewokske medisynman Logray. Dyselde fiert in ritueel út wêrby't er bylden opropt fan Jeremitt en Catarine, dy't as in soarte fan húsdieren finzen holden wurde troch de Gorax. Hoewol't se har befine yn in fier lân, dêr't noch nea in Ewok libben út weromkeard is, beslute Deej en syn soannen om mei de minskebern op in kweeste te gean dy't liede moat ta de befrijing fan harren âldelju. Nei't Logray de seine fan 'e goaden oer harren ôfsmeekt hat, sette Deej, Wicket, Weechee en Widdle mei Mace en Cindel en in stikmannich lêstdieren ôf.

Underweis jouwe twa oare Ewoks, de stoere houtsjer Chukha-Trok en de wize preesteresse Kaink, har by de karafaan. Op in nacht wurdt harren kamp besocht troch Wisties: lytse semy-yntelliginte humanoïde wêzentsjes ter grutte fan in finger dy't yn it tsjuster in fel ljocht ôfsmite. Ien dêrfan fljocht earne by op en bliuwt ferdôve efter as har soartgenoaten harren wer ôfjouwe. Mace pakt har op en fersoarget har. Hy draacht har neitiid mei yn syn boarstbûse en neamt har Izrina. Nei gâns aventoeren en in lange, lange reis troch wâld, woastyn en wyldernis komme de Ewoks en de bern einlings en te'n lêsten oan by de wente fan 'e Gorax, dy't úthoud is yn in berch.

Mei help fan 'e tsjoenderij fan foarwerpen dy't Logray harren meijûn hat, witte de Ewoks en de bern de yngong te finen. Dêre bliuwt Cindel efter ûnder beskerming fan Wicket en Widdle. Deej, Weechee, Chukha-Trok, Kaink en Mace sette fierder de útholle berch yn, wêrby't se tanksij de tsjoenderij fan Kaink in oanfal fan reuseftige spineftige wêzens ôfslaan kinne, dy't harren oer it mad komme by it oerstekken fan in djippe kleau. Uteinlik witte se, heech yn 'e berch, de wenromten fan 'e Gorax te berikken. Wylst Weechee it reuseftige wêzen ôfliedt en fuortlokket, befrije de oaren Catarine en Jeremitt út in heech boppe de flier hingjende koai. Wylst de oaren útnaaie, dekt Chukha-Trok de ôftocht troch mei syn bile op 'e fuotten fan 'e Gorax yn te huffen. Tagelyk gûnzet Izrina it meunster om 'e holle hinne om him ôf te lieden. Yn razernij en pine slacht it reuseftige wêzen tsjin 'e wanden oan en feroarsaket sa in lytse ynstoarting wêrby't Chukha-Trok deadlik rekke wurdt troch fallend pún. Mace is by him as er stjert en kriget fan him syn bile.

Nei't Mace him wer by de oaren jûn hat, wachtsje se de Gorax op by de treppen dy't nei de kleau ta liede, dêr't Jeremitt en Deej in tou dwers oer it rinpaad spanne. De Gorax stroffelet dêr oer en knoffelet yn 'e kleau. De Ewoks en minsken wane him dea, mar as Cindel mei Wicket en Widdle oan 'e oare kant fan 'e kleau ferskynt om 'e oaren te helpen by it oerstekken, klimt de Gorax der oan har kant wer út. Sy en de beide jongste Ewoks wurde rêden troch Mace, dy't de bile fan Chukha-Trok smyt en dêrmei de Gorax tusken de skouderblêden rekket, dat er swierferwûne weromfalt yn 'e kleau, en diskear alhiel nei de boaiem. Mace en de oaren wurde oer de kleau hinne holpen en neitiid keare de Towani's mei de Ewoks werom nei harren doarp. Dêr ienris oankommen, lit Mace Izrina yn it wâld frij. De Towani's beslute om by de gastfrije Ewoks te útfanhûzjen oant se harren romteskip reparearre hawwe.

Rolferdieling

Warwick Davis yn 2007.

haadrollen

personaazje	akteur/aktrise
Mace Towani	Eric Walker
Wicket	Warwick Davis (fysyk) en Darryl Henriques (stim)
Cindel Towani	Aubree Miller

byrollen

personaazje	akteur/aktrise
ferteller	Burl Ives
Deej	Daniel Frishman (fysyk) en Sydney Walker (stim)
Weechee	Debbie Lee Carrington
Widdle	Tony Cox
Chukha-Trok	Kevin Thompson
Kaink	Margarita Fernández
Catarine Towani	Fionnula Flanagan
Jeremitt Towani	Guy Boyd
Shodu	Pam Grizz
Logray	Bobby Bell

Produksje en distribúsje

Produksje

Nei it ûnbidige súkses fan Star Wars: Episode VI – Return of the Jedi (1983), it ôfslutende diel fan 'e oarspronklike Star Wars-trilogy, waard besletten om 'e fans fierder te betsjinjen troch in op bern rjochte tillefyzjespecial te meitsjen oer ien fan 'e populêrste eleminten út 'e Return of the Jedi, de knuffelige, teddybeareftige Ewoks, in ras fan heallange bûtenierdske wêzens fan 'e Boskmoanne Endor.

Star Wars-betinker George Lucas hie yn 1978 tastien dat ta gelegenheid fan Thanksgiving en de oankommende krystdagen in tillefyzjespecial yn it ramt fan 'e franchise makke waard, de Star Wars Holiday Special. Mei't hysels en syn filmstudio Lucasfilm doe drok wiene mei de promoasje fan Star Wars: Episode IV – A New Hope (1977) en de risselwaasje foar Star Wars: Episode V – The Empire Strikes Back (1980), hied er dat grutdiels oerlitten oan tillefyzjenetwurk CBS, tillefyzjestudio 20th Century Fox Television en de belutsen tillefyzjeprodusinten. Dyselden hiene der sa'n potsje fan makke dat Lucasfilm en Lucas sels danich yn ferlegenheid brocht wiene troch it rûnom as striemin beoardiele resultaat. Lucas wie wisberet dat him dat gjin twadde kear oerkomme soe, dat hy soarge dat er diskear grutter kontrôle oer it tillefyzjeprojekt behold.

De tillefyzjespecial waard yn 't earstoan The Ewok Adventure ("It Ewok-aventoer") neamd en krige pas letter de namme Caravan of Courage: An Ewok Adventure ("Karafaan fan Moed: In Ewok-aventoer"). As produsinten wiene Thomas G. Smith en Patricia Rose Duignan by it projekt belutsen foar de studio's Lucasfilm, Korty Films en 20th Century Fox Television. George Lucas sels hie as útfierend produsint it tafersjoch oer de hiele produksje. De special waard fisualisearre was in krusing fan Hâns en Grytsje mei Tarzan of the Apes. Oarspronklik soe it programma mar in spyldoer fan in healoere hawwe.

Doe't er mei it projekt út te suteljen gie by de grutte Amerikaanske tillefyzjenetwurken lâns, ûntdiek Smith dat nimmen siet te wachtsjen op in special fan in healoere, mar ABC hie wol belangstelling foar in tillefyzjefilm fan twa oeren (ynkl. reklameblokken) as in 'film fan 'e wike'. Dêrop waard de special oprutsen om oan dat ferlet te foldwaan. Lucas keas John Korty, dy't yn 1983 foar Lucasfilm de film Twice Upon a Time regissearre hie, út as regisseur. Dyselde wurke nei in senario dat skreaun wie troch it bernefamke fan Lucas syn bern, Bob Carrau, op basis fan ideeën fan Lucas sels. Korty wie ek ferantwurdlik foar de kamerarezjy, wylst de filmmuzyk fersoarge waard troch Peter Bernstein.

Opnamen

De opnamen foar Caravan of Courage fûnen plak yn 'e wyldernis fan Marin County, yn Noardlik Kalifornje, relatyf deunby San Francisco, dêr't Lucasfilm fêstige wie. De sênes yn it wâld op Endor waarden dêr filme yn it Nasjonaal Park Redwood. De makkers fan 'e film keazen foar in styl dy't gâns ôfwykt fan oare films út 'e Star Wars-franchise, mei as opmerklikste feroaring de tafoeging fan in alwittende ferteller yn in voice-over dy't ynsprutsen waard troch akteur Burl Ives.

Caravan of Courage en it ferfolch dêrop, Ewoks: The Battle for Endor, wiene de lêste films fan Lucasfilm dy't makke waarden mei it gebrûk fan stop-motiontechniken. Industrial Light & Magic, de special effects-difyzje fan Lucasfilm, gie nammentlik yn 'e earste helte fan 'e 1980-er jierren oer op go-motion, in mear avansearre foarm fan animaasje mei motorisearre marionetten. Dat wie lykwols te djoer foar in tillefyzjefilm, dat foar de beide Ewoks-films waard weromgrypt op 'e âldere techniken. It beheinde budget wie ek ôf te sjen oan 'e bisten dy't yn Caravan of Courage omrinne en -fleane, dat hiele gewoane Ierdske bisten binne (lykas hynders, lama's, nuete kninen, hinnen, in fret en in ûle), dy't yn it "Stjerrestelsel fier, fier fuort" fan 'e djoerdere bioskoopfilms fan 'e Skywalker Saga nea sa yn byld brocht wiene.

Distribúsje

De distribúsje fan wat doe noch The Ewok Adventure hiet, waard fersoarge troch 20th Television, de tillefyzjedistribúsjedifyzje fan filmstudio 20th Century Fox. De film waard op 25 novimber 1984 foar it earst op 'e Amerikaanske tillefyzje útstjoerd troch it tillefyzjenetwurk ABC, ta gelegenheid fan it Thanksgivingwykein. Om utens waard de film yn guon lannen en territoaria yn 'e bioskoop útbrocht, wêrfoar't de titel feroare waard yn Caravan of Courage: An Ewok Adventure. Neitiid hat de film altyd sa bekend stien.

Seleksjes fan 'e soundtrack fan Caravan of Courage waarden yn 1986 op LP útbrocht troch platemaatskippij Varèse Sarabande. Yn 1990 waard de film fia Metro-Goldwyn-Mayer op VHS-keapfideo útbrocht. Op 23 novimber 2004 ferskynde Caravan of Courage yn 'e mande mei de ferfolchfilm Ewoks: The Battle for Endor op ien dvd, mei as titel Star Wars: Ewok Adventures. Nei de oername fan Lucasfilm troch The Walt Disney Company, yn 2012, krige Disney de rjochten op 'e beide Ewoks-films yn 'e hannen. De eigen streamingtsjinst fan dy studio, Disney+, hie nei syn lansearring yn 2019 gjin plannen om 'e Ewoks-films beskikber te meitsjen, mar nei't haadrolspiler Eric Walker dêrta in hantekeninge-aksje begûn wie, waarden de beide films op 2 april 2021 foar streamen frijjûn.

Untfangst

Fan 'e tillefyzjekritisy krige Caravan of Courage doedestiden oer it algemien lauwe resinsjes. Yn The New York Times omskreau John J. O'Connor de plot fan 'e film yn novimber 1984 as "hast agressyf ienfâldich", en ek wied er fan miening dat "Lucas-en-dy neat optinke dat bot bjusterbaarlik is". De setting, besteande út it lânskip fan Marin County, fûn er derút sjen as "it iene of oare neatochtlân beëasten de sinne en bewesten de moanne," wylst er de ynteraksjes tusken de haadrolspilers werom koe as lang fêstige sinematyske klisjees. Hy hie in beskate mjitte fan lof foar de doe fjirtjinjierrige akteur mei dwerchgroei Warwick Davis, dy't de rol fan Wicket spile, en dy't er "de bêste fan it espel" neamde.

Douglas Brode en Leah Deyneka, de skriuwers fan it boek Myth, Media, and Culture in Star Wars: An Anthology (2012), wiene fan miening dat Caravan of Courage, de personaazjes en ploteleminten yn acht nommen, eins mear beskôge wurde moast as in mearke ynstee fan as science fiction-film. Se wiisden dêrfoar ek nei it foarkommen fan tsjoenderij yn 'e film, dat dúdlik in ûnderdiel fan fantasy is en net fan science fiction. Feitliks bliuwt it science fiction-elemint yn 'e film beheind ta it delstoarte romteskip fan 'e húshâlding Towani, mei't it eigentlike delstoarten dêrfan net yn byld brocht wurdt. Foar de rest binne de iennichste bannen mei it science fiction-sjenre dat it ferhaal yn it Star Wars-hielal plakfynt en dat de Ewoks bûtenierdske wêzens binne, mar poer binnen de kontekst fan dizze film hiene se likegoed mearkewêzens wêze kinnen.

Colin Greenland, dy't Caravan of Courage yn maart 1985 resinsearre foar it tydskrift Imagine, omskreau de film as "in flechtige opsomming fan magyske hokus-pokus oer ferskate foarâlderlike talismans dy't de koäla's op har kweeste meidrage." Hy stelde fêst: "It foel der wakker yn by de acht- en njoggenjierrigen op earste rige, mar harren heiten en memmen begriepen der net folle fan, en iksels likemin." Tsjintwurdich binne de kritisy noch in stik negativer oer de film, dy't de tosk des tiids net botte goed trochstien hat, sa is de algemiene opiny. Aidan Mason, dy't Caravan of Courage yn maaie 2021 beoardiele foar Pop Culture Beast, neamde de film bgl. "in ferhaal sûnder ienich gefoel fan urginsje" en "in hiele put om út te sitten".

Prizen

Caravan of Courage: An Ewok Adventure wie yn 1985 ien fan fjouwer tillefyzjefilms dy't de Emmy Award, de wichtichste Amerikaanske priis foar tillefyzjeprogramma's, takend krigen yn 'e kategory bêste special effects. De film wie ek nominearre foar de Emmy foar bêste berneprogramma, mar ferlear dy priis oan 'e ôflevering Displaced Person fan 'e tillefyzjesearje American Playhouse.

Ferfolchfilm

Caravan of Courage: An Ewok Adventure wie, fral by bern, sa'n súkses, dat Lucasfilm besleat ta it meitsjen fan in ferfolchfilm, dy't Ewoks: The Battle for Endor kaam te hjitten. Dy film waard in jier letter, yn novimber 1985, mei Thanksgiving op 'e Amerikaanske tillefyzje útstjoerd. Fierhinne deselde cast kearde dêrfoar werom.

Keppelings om utens

• (in) Ynformaasje oer Caravan of Courage: An Ewok Adventure yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.